
马尔巴大师教言集MARPA38ཐུན་མོང་མ་ཡིན་པའི་དམ་ཚིག་བརྒྱད་པ།
2-1-136b
༄༅། །ཐུན་མོང་མ་ཡིན་པའི་དམ་ཚིག་བརྒྱད་པ།
༈ ཐུན་མོང་མ་ཡིན་པའི་དམ་ཚིག་བརྒྱད་པ་ཞེས་བྱ་བ། དཔལ་འཁོར་ལོ་སྡོམ་པ་ལ་ཕྱག་འཚལ་ལོ། །ཐུན་མོང་མ་ཡིན་པའི་དམ་ཚིག་རྣམ་པ་བརྒྱད་ལས། རེ་རེ་ལའང་དོན་རྣམ་པ་ལྔ་སྟེ། དམ་ཚིག་ཉམས་པའི་སྐྱོན་དང་། བསྲུང་བའི་ཕན་ཡོན་དང་། ལྟུང་བ་རྫོགས་པའི་ཚད་དང་། དམ་ཚིག་གི་དབྱེ་བ་དང་། ཉམས་ན་ཕྱིར་བཅོས་པའི་ཐབས་སོ། །དེ་ལ་དམ་ཚིག་ཉམས་པའི་སྐྱོན་ནི། 
2-1-137a
བསོད་ནམས་ཟླ་བ་མར་ངོ་བཞིན་ཇེ་ཆུང་ཇེ་ཆུང་ལ་འགྲོ། བསམ་པ་ཐམས་ཅད་མི་འགྲུབ། འཇིག་རྟེན་གྱི་དངོས་གྲུབ་ཕྲ་མོ་ཅི་བསྒྲུབ་ཀྱང་མི་འགྲུབ་པའོ། །དམ་ཚིག་བསྲུང་བའི་ཕན་ཡོན་ལ་བཞི་སྟེ། བསོད་ནམས་ཟླ་བ་ཡར་གྱི་ངོ་བཞིན་དུ་ཇེ་ཆེ་ལ་འགྲོ་བ་དང་། ཅི་བསམ་པ་ཐམས་ཅད་འགྲུབ་པ་དང་། འཇིག་རྟེན་གྱི་དངོས་གྲུབ་ཕྲ་མོ་ཅི་བསྒྲུབ་པ་འགྲུབ་པ་དང་། ཤི་ནས་བར་མ་དོར་ཕྱག་རྒྱ་ཆེན་པོ་མཆོག་གི་དངོས་གྲུབ་འགྲུབ་པའོ། ལྟུང་བ་རྫོགས་པའི་ཚད་ནི། ཤེས་པ་རང་བཞིན་དུ་མི་གནས་པའི་དུས་མ་ཡིན་པར་རྡོ་རྗེ་སློབ་དཔོན་ལྟ་བུ་ལ་ལོག་པར་ལྟ་བའམ་ངན་སེམས་ཀྱི་བསམ་པས་སྦྱོར་བ་དང་དངོས་གཞི་དང་མཐར་ཐུག་གསུམ་ཚང་ན་ལྟུང་བ་རྫོགས་པ་ཡིན་ཏེ། གཞན་ལའང་དེ་བཞིན་དུ་ཤེས་པར་བྱའོ། །དམ་ཚིག་གི་དབྱེ་བ་ལ་བརྒྱད་ལས། བུམ་དབང་བསྐྱེད་རིམ་དང་འབྲེལ་བས་བསྲུང་བར་བྱ་བའི་དམ་ཚིག་ལ་གསུམ་སྟེ། གཡོན་པའི་ཀུན་ཏུ་སྤྱོད་པ་བྱེད་ཅིང་བསྐྱེད་པའི་རིམ་པ་བསྒོམ་པ་ལས་མི་འདའ་བ་དང་། རྡོ་རྗེ་སློབ་དཔོན་ལ་ཡང་དག་པར་རྫོགས་པའི་སངས་རྒྱས་དངོས་ཀྱི་འདུ་ཤེས་བཞག་པ་དང་། རྡོ་རྗེའི་སྤུན་ལ་ས་ལ་གནས་པའི་འདུ་ཤེས་བཞག་པ་དང་གསུམ་མོ། །གསང་དབང་རྩ་རླུང་དང་འབྲེལ་བས་བསྲུང་བ་ལ་
2-1-137b
གཉིས་ཏེ། གསང་དབང་ཆགས་ལམ་ལ་བསྐུར་ན་རིགས་ལྔའི་མཁའ་འགྲོ་མ་ལས་ཀྱི་ཕྱག་རྒྱའི་ངོ་བོ་ཡིན་ནོ། །གྲོལ་ལམ་ལ་བསྐུར་ན་རིགས་ལྔའི་མཁའ་འགྲོ་མ་བྱིན་རླབས་སྟེར་མཁན་ཡིན་པས་མཁའ་འགྲོ་མ་ལ་དུས་དུས་སུ་ཚོགས་མཆོད་འབུལ་བ་དང་། ཕྱི་སྣོད་ཀྱི་འཇིག་རྟེན་ལྷའི་གཞལ་ཡས་ཁང་ཡིན། ནང་བཅུད་ཀྱི་སེམས་ཅན་ལྷ་དང་ལྷ་མོའི་རང་བཞིན་ཡིན་པས་སེམས་ཅན་ལ་ཞེ་སྡང་མི་བསྐྱེད་པའོ། །ཤེས་རབ་ཡེ་ཤེས་ཀྱི་དབང་དགའ་བ་བཞི་དང་འབྲེལ་བ་ལ་གཉིས་ཏེ། ཆགས་ལམ་ལ་བསྐུར་ན། མཁའ་འགྲོ་མ་བཞི་ལས་ཀྱི་ཕྱག་རྒྱའི་ངོ་བོ་ཡིན། གྲོལ་ལམ་ལ་བསྐུར་ན་མཁའ་འགྲོ་མ་བཞི་བྱིན་རླབས་སྟེར་མཁན་ཡིན། དེ་རྣམས་ཀྱི་འཁོར་ན་མགོ་བརྙན་མ་བཞི་གནས་པས་དེ་དག་ལ་མ་གུས་པ་སྤང་བའི་ཕྱིར་མོར་གྱུར་པ་ཐ་ན་དུད་འགྲོ་ཡན་ཆོད་ལ་མི་བརྙས། མི་རྫོགས། རྔན་མི་བགྲང་བ་དང་། རང་ལུས་ཀྱི་ཐིག་ལེ་དབང་རྫས་དང་། ཐིག་ལེ་ལ་བརྟེན་ནས་དགའ་བ་སྐྱེ། བདེ་བ་ལ་བརྟེན་ནས་མི་རྟོག་པ་སྐྱེ་བས་རང་གི་ཐིག་ལེ་རྨི་ལམ་དུའང་མ་ཤོར་བར་བྱེད་པ་གལ་ཆེའོ། །བཞི་པ་ཚིག་དབང་རིན་པོ་ཆེ་སྟོང་པ་ཉིད་དང་འབྲེལ་བས་བསྲུང་བར་བྱ་བའི་དམ་ཚིག་གཅིག་སྟེ། ཆོས་ཐམས་ཅད་སྟོང་པ་ཉིད་ལ་མ་གུས་པ་སྐད་ཅིག་ཀྱང་སྐྱེར་མི་རུང་བའོ། །ཕྱིར་བཅོས་པའི་ཐབས་ལ་གཡོན་
2-1-138a
པའི་ཀུན་ཏུ་སྤྱོད་པ་མི་བྱེད་ཅིང་བསྐྱེད་རིམ་ལས་འདས་ན་འཇིག་རྟེན་གྱི་མཁའ་འགྲོ་མ་ལ་ཚོགས་གཏོར་བཏང་། འཇིག་རྟེན་ལས་འདས་པའི་མཁའ་འགྲོ་མ་ལ་མཆོད་པར་བྱའོ། །རྡོ་རྗེ་སློབ་དཔོན་ལ་དམ་ཚིག་ཉམས་ན་དེ་ཉིད་བཞུགས་ན་དབང་བསྐུར་ཞུ། མི་བཞུགས་ན་ཡི་དམ་ལ་དབང་བསྐུར་ལེན་པའོ། །རྡོ་རྗེ་སྤུན་དང་དམ་ཚིག་ཉམས་ན་དེ་ཉིད་བཞུགས་ན་ཚོགས་འཁོར་བྱ་བཟོད་པ་གསོལ་ལོ། །མཁའ་འགྲོ་མ་ལ་ཚོགས་མཆོད་མ་གྲུབ་ན་བདུད་རྩི་རིལ་བུ་བརྟེན། སེམས་ཅན་ཐམས་ཅད་ལ་སྡང་བ་སྐྱེས་ན་ཚད་མེད་པ་བཞི་རླུང་དགའ་བ་བཞི་དང་བསྲེ་ལ་བསྒོམ་པར་བྱའོ། །ཐིག་ལེ་ཤོར་ན་གསང་བའི་རྡོ་རྗེའི་སྐེད་པར་ཐིག་ལེ་གཡོན་དུ་འཁོར་བ་ལ་ཤེས་པ་གཏོད་དོ། །བུད་མེད་གྱུར་པ་ལ་བརྡུང་བརྡེག་བྱས་ན་འཇིག་རྟེན་ལས་འདས་པའི་མཁའ་འགྲོ་མ་ཐམས་ཅད་ལ་ཚོགས་ཀྱི་འཁོར་ལོ་དབུལ། རང་གི་སྤྱི་བོར་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པར་བསམ་ལ། ལྟེ་བ་ནས་གཏུམ་མོ་འབར་བས་རྡོ་རྗེ་སེམས་དཔའི་ཞབས་གཡོན་པའི་མཐེ་བོང་ལ་རེག་སྟེ། བདུད་རྩི་བབས་པས་ལུས་ཁེངས་པར་བསམ་ཞིང་ཡི་གེ་བརྒྱ་པ་བཟླའོ། །ཆོས་ཉིད་སྟོང་པ་ཉིད་ལ་མ་གུས་པ་སྐྱེས་ན་ཆོས་ཐམས་ཅད་རྣམ་པར་ཐར་པའི་སྒོ་
2-1-138b
བཞིས་སྟོང་པར་བསྒོམ་པར་བྱའོ། །ཐུན་མོང་མ་ཡིན་པའི་དམ་ཚིག་བརྒྱད་པ་ཞེས་བྱ་བ་གསང་སྔགས་ལམ་གྱི་འདུལ་བ། འབྲས་བུ་མཆོག་དང་ཐུན་མོང་ཐོབ་པར་བྱེད་པའི་གྲོགས་བདེ་མཆོག་རྩ་བའི་རྒྱུད་ཀྱི་ལེའུ་ཉི་ཤུ་རྩ་དྲུག་པ་ནས་གསུངས་པ་ལྟར། མར་པ་ཆོས་ཀྱི་བློ་གྲོས་ཀྱིས་ཉེ་བར་མཁོ་བའི་ཆེད་དུ་གྲོ་བོ་ལུང་གི་དགོན་པར་བཀོད་པའོ།། །།


目录
ཐུན་མོང་མ་ཡིན་པའི་དམ་ཚིག་བརྒྱད་པ།